Svandís Svavarsdóttir

Heilbrigðisráðherra og þingmaður, 1. sæti

Ég hef starfað við kennslu og rannsóknir á íslenska táknmálinu, verið borgarfulltrúi í Reykjavík 2006-2009 og þingmaður fyrir Vinstri græn frá árinu 2009. Árin 2009-2013 var ég umhverfisráðherra og hef verið heilbrigðisráðherra síðan 30. nóvember 2017.

Á sviði heilbrigðismála hefur mikið áunnist á kjörtímabilinu og rauði þráðurinn hefur verið að efla opinberu heilbrigðisþjónustuna, svo að tryggja megi öllum greiðan og jafnan aðgang að heilbrigðisþjónustu sem stenst alþjóðlegan samanburð.

Verkefnin stjórnarsáttmála í heilbrigðismálum eru nánast öll fullunnin. Þar má til dæmis nefna að heilbrigðisstefna til 2030 hefur verið samþykkt á Alþingi og, framkvæmdir við nýjan Landspítala eru hafnar af krafti og ganga vel, greiðsluþátttaka sjúklinga fyrir heilbrigðisþjónustu hefur lækkað mikið og geðheilbrigðisþjónusta hefur verið efld svo um munar, sérstaklega í heilsugæslunni.

Á næsta kjörtímabili þurfum við að halda áfram að halda vel utan um fólk og gæta að félagslegum jöfnuði. Heimsfaraldur Covid-19 hefur haft í för með sér áskoranir fyrir landsmenn og við þurfum til dæmis að tryggja atvinnu fyrir alla og missa ekki sjónar á að bæta þarf stöðu þeirra sem glíma við erfiðleika vegna faraldursins. Að því höfum við unnið og því verður fylgt fast eftir.

Umhverfis- og loftslagsmál eru lykilmál og náttúruvernd verður alltaf að vera í brennidepli og hverfa þarf frá sóun og ágengri nýtingu.Við þurfum að tryggja að unga fólkið okkar vilji búa og starfa hér á landi, það geti komið sér upp húsnæði við hæfi, búi við trygg kjör, fæðingarorlof og gott stuðningskerfi í námi. Uppeldi og menntun eiga að vera í fyrirrúmi ásamt stuðningi við börn sem á honum þurfa að halda.

Kynjajafnrétti og önnur jafnréttismál eru mikilvæg í allri pólitík og til að fullum jöfnuði verði náð má aldrei missa sjónar á mikilvægi kynjasjónarmiða í allri ákvarðanatöku.

Instagram: svandissvavarsdottir

Facebook: Svandissvavars

Aðrir frambjóðendur